Luke 16
Iesu viten tatavolien tai usil mukave meatin keil koa asak mesen keil ven navong iha en out nesa suval avat tai koa mumon vatin
1Navong Iesu mul veah en sise vaha en out Serusalem, kei viten tatavolien koanek min meatin keil onen vit, “Avong tai, hetamen tai mul koa bisnis onen mul. Ka kei ling meatin sav vi avat valekat bisnis ka tounah sav keil onen. Avat enek mum va vio ... hetamen onen kur longlongien vit avat onen mul purun tounah keil onen. 2Sakini, kei vise avat onen mai veni ka viteni mini vit, '?Asa ke namul nalonge usiluk? Kiha kitis usil umen vasi keil koa komumoni en usite onak, veni, hervitei tuetin, niso latuk ran umen ekek.'3“Navong avat enek longe mukok, viten sasen eni vit, “Hetamen onak heso lat nau ran umen onak. ?Munak hemukonek, numon sa varei? Avek rokeihtei makah atan, ka namemou mahiram ven mane min meatin keil. 4!Ah! Nakilea asa moumoni. Munak numon koanik, navong nivus ran umen ekek, timue keil onak hel, ka keil ikur revi nau en teim se.'
5“Sakini, avat enek vise retai en meatin keil koa kaon one mul ral min hetamen onen. Koa mai mulamu, avat enek visi vit, '?Kokur sa ran hetamen onak?'
6“Ka meatin enek vit kesi vit, 'Nakur teram oel ten olip heite handred tai (100).'
“Ka avat enek viteni mini vit, ‘Kikalah, kikur pepa ten kaon onom, kitei mane teni hemita netan hehi hanumau elu ka halualim emun (50) enges.'
7“Evus, kei vise tateisav emai ka visi vit, ‘?Ka keik, kokur asa ran hetamen onak?’
“Ka kei vit kesi vit, ‘Mulamu, nakur bak pulaoa taosen tai (1000).’
Ka avat enek viteni mini vit, ‘Kikur pepa ten kaon onom ka kitei mane teni hemita netan enges vavinvin en bak hehi handred outel (800) enges.'
8Sakini, navong hetamen long usili keke avat onen mumon vatin, kei viteni mini vit, “Avaseini keke komumon vatin, sakien onom rie lat meteisauen onom veni komul komundem usil avong keil koa hemai veah navong niso latuk ran umen enek.'”
Evus, Iesu viten aneite ten tatavolien enek min meatin keil onen vit, “Naviten koanik veni meatin keil ten out netan amumon vatie navong keil amum ral min tue keil keke atahos min keil navong aro veah en out netan. Ka sakien keil one tahos imok mulin sakien onen koakeil amul en meneai. 9Ka naviteni min kami, mane onami sakras val vataveah. Sakini, mihelah meatin keil imai avahi tuami keil ka mihekataun keil hetal tounah keil onami en out netan ekek. Veni navong mihelokovein tounah keil onami en out netan, timue keil onami ikur revi kami en teim se keil en out nesa.
10“Meatin koa mul losil kat revi tounah koa havivi, kei kilea valosil kat revi tounah koa marite mun. Ka meatin koa purun tounah koa havivi, kei kilea emun vapurun tounah koa marite. 11Sakini, munak meatin keil armundesinuktei vatal min tounah keil ten out netan, Ahi mun sakras vandesinuk vatal min more tounah keil koa hetetamen imok. 12Ka munak korlei kat revitei tounah keil koa Ahi lingi en hem en out netan, kei sakras vasan etai mun tounah minuk en out nesa.
13“Slev tai sakras voum ven asuv valu. Munak hemukonek, kei hesesein tai, ka ienvatien onen hel en tateisav. Vuo helong kat tai, ka helele hetisa en tateisav. Kosakras kovaha netan min Ahi vatal min mane.” 14Navong Farasi keil along selusien keil ekek, keil amunge kat Iesu, veni ienvatien one mul en mane.
Iesu selus usil sakien koa Farasi keil arali koteh mengkatien keil onen Ahi eni a
15Ka Iesu viteni min Farasi keil vit, “Kami mimum keih vasakin mesav keil avandemi avahit mimal revi, ka Ahi kilea en rendemien onami. Veni tounah keil koa meatin keil amundemi avit tahos, kei tisaso en meten Ahi.16“Mulamu, mengkatien keil onen Mosis ka tisien keil onen provet keil arie lat sise onen Ahi min meatin keil rokol avong koa Sion mai ka vi baptaes en meatin keil. Ka kosa heha, avitehiten more longlongien usil hiasuvien onen Ahi. More longlongien enek mul ka rahit out vasi ka meatin houlu amul asak visi keih keke avasakin Ahi vamai vahi asuv houlu en moulien one.
17“Avaseini munak out nesa ka out netan luhevus en avong etai, ka hati selusien ten mengkatien keil onen Ahi, keihoen teni sakras vavus. 18Ven koanik, meatin koa lokovein ahin onen ka eva kur ahin sav mul mumon tisaen ral mini. Ka meatin koa retalihe ral min ahin koa lokovein meatin onen, kei mun mul mumon tisaen ral mini.” ▼
Iesu vihisei usil mahien koa hemai en koakeil ienmahisien one tovuol
19Iesu viten tunien tai min meatin keil vit, “En avong tai, meatin tai mul koa tounah onen houlu. Kei musin en more eisin keil koa mane ten keil keih, ka kilea vahul tounah vasi enges koa kei ien vati. En moulien onen, kei longe tahos lises. 20Ka vesesal en meteau ten teahu onen, lisenges meatin tamun mul matil ien ka mul viram en meatin keil ven mane, isen Lasaros. Kei, tounah onen tovuol, sakras vakaka, ka aven vi manu enges. 21Ka navong rotos mukonek, huli keil umai ka aramus manu keil onen. Ka en avong vasi, Lasaros ien vati van soke anien keil koa meatin enek rivini va.22“Luro mukonek va vio ... meatin koa tounah onen tovuol enek mat, ka angelo keil akuri alingi rondan ral min avu Ebraham en mari anien tai en out nesa. Rovitei tueitin, meatin koa tounah onen houlu emun mat, ka arahini. 23Ka meatin enek va en out onen Temat, ka mahien onen mariso. Ka navong lele soutin vina nesa, les avu Ebraham ka Lasaros koa mul rondan en usite onen. 24Sakini, kei viso keih vit, '!Avu Ebraham, iem hemahis nau li! Sila Lasaros hemita ekok keke hesan hati oai mamuni vasakin mek vamandil neli. Veni namul nalonge tisa houlu en ahang ekek.'
25“Ka Ebraham viteni mini vit, ‘Natkuli, kindem visi mau. En moulien onom en out netan, keik koles tahosien en avong vasi, ka Lasaros les mahien enges. Ka kosa, kei les tahosien en out ekek, ka keik, komul kokur mahien esuk keisom. 26Ka tamun, mari poal tai mul koa keite teni tovuol koa ka vas keik ran komal. Sakini, komal melsakras melvoual koteh keke melvahat venuk. Ka keik ka koakeil emun aro ral minuk misakras mivalokovein out onami keke mivamai ekok ven komal.'
27“Ka meatin koa tounah onen houlu viteni mini vit, 'O avu Ebraham, hemukonek napeahik kisila Lasaros heha en teim sen tata onak. 28Veni en out enek, tuak elim (5) telro ien. Kimaeni heha hesel kat keil ihiles ran sakien tisa keil one keke anamaitei en out ten mahien ekek.'
29“Ka Ebraham vit kesi mini vit, 'Mengkatien keil onen Mosis ral min selusien keil onen provet keil telamu mul tuai keke vasan selkatien min vatiamal keil onom. Mal keke ilong kat selusien keil teni.'
30“Ka meatin enek vit kesi mini vit, '!Vuo! !Avu Ebraham, koanek rovinvintei veah! Ka vahit meatin tai vamea ris vamoul ran matien ka vaha ven keil, keil ilei kilea suk, ka ihiles moulien one ran sakien tisa keil one.'
31“Ka Ebraham selus ekor mini vit, 'Munak keil arlong kattei mengkatien keil onen Mosis ka selusien onen provet keil, keil asakras avalong kat selusien onen meatin tai koa moul eris ran matien.'”
Copyright information for
PMA